އިތުރު ގެސްޓުހައުސްއެއްގެ ހުއްދަ ބާޠިލްކޮށްފި

ދެކުނު އޭޝިއާގެ ފަތުރުވެރިންނަށް ހެލްތު ޕްރޮޓެކްޝަން އެޖެންސީގެ ގައިޑްލައިނާއި ޚިލާފަށް ޚިދުމަތް ފޯރުކޮށްދެމުން ދިޔަ އިތުރު ގެސްޓުހައުސްއެއްގެ ލައިސަންސް ޓޫރިޒަމް މިނިސްޓްރީން ސަަސްޕެންޑްކޮށްފިއެވެ.

ޓޫރިޒަމް މިނިސްޓްރީން ބުނީ، އެޗްޕީއޭއާއި އެ މިނިސްޓްރީން އެކުލަވައިލި ގައިޑްލައިނާއި ޚިލާފުވި ގެސްޓުހައުސްއެއްގެ ހުއްދަ ބާޠިލްކޮށްފައިވާ ކަމަށާއި އެއީ މާލެ ސަރަހައްދުގައި ހިންގާ ގެސްޓު ހައުސްއެއް ނަމަވެސް އެ ތަނުގެ ނަން ހާމަކޮށްފައެއް ނުވެއެވެ.

މި މަހުގެ 17 ގައި ވެސް އެޗްޕީއޭގެ ގައިޑުލައިނާއި ޚިލާފަށް ދެކުނު އޭޝިއާގެ ފަތުރުވެރިންނަށް ޚިދުމަތް ފޯރުކޮށްދެމުން ދިޔަ 3 ގެސްޓުހައުސްއެއްގެ ހުއްދަ ބާޠިލްކޮށްފައިވާ އިރު، އިތުރު 3 ތަނަކަށް ވަނީ އިންޒާރު ވެސް ދީފައެވެ.

ރާއްޖޭގެ ބޯޑަރު ދެކުނު އޭޝިއާގެ ފަތުރުވެރިންނަށް ހުޅުވައިލީ މި މަހުގެ 15 ވަނަ ދުވަހުއެވެ. ނަމަވެސް އެ ޤައުމުތަކުން ރާއްޖެ އަންނަ ފަތުރުވެރިން، މީހުން ދިރިއުޅޭ ރަށްރަށާއި، އެ ރަށްރަށުގެ ގެސްޓު ހައުސްތަކަށް ނުގެންދެވޭނެ ކަމަށް އެޗްޕީއޭއިން ވަނީ އަންގާފައެވެ.