ފިރިހެން ކުއްޖަކަށް އަނިޔާކުރި މީހަަކުު ދޫކޮށްލައިފި

ށ.ޅައިމަގުގައި ފިރިހެން ކުއްޖަކަށް އަނިޔާކުރި މައްސަލައިގައި ހައްޔަރުކުރި 3 މީހުންގެ ތެރެއިން އެކަކު ދޫކޮށްލައި، ދެން ތިބި 2 މީހުންގެ ބަންދުގެ މުއްދަތު އިތުރުކޮށްފިއެވެ.

ޅައިމަގުގައި ޢުމުރުން 17 އަހަރުގެ ފިރިހެން ކުއްޖެއްގެ ގައިގައި ތަޅައި އަނިޔާކުރި މައްސަލައެއް ފުލުހުންނަށް ހުށަހެޅީ އޮގަސްޓުމަހުގެ 23 ގައެވެ.

އެ މައްސަލައާއި ގުޅިގެން ޢުމުރުން 26 އަހަރުގެ ދިވެހި 2 ފިރިހެނަކާއި،31 އަހަރުގެ ދިވެހި ފިރިހެނަކު ހައްޔަރުކުރީ އޮގަސްޓު 25 ގައެވެ.

އެ މީހުންގެ ބަންދާމެދު ގޮތެއް ނިންމުމަށް ށ.ފީވަކު މެޖިސްޓްރޭޓް ކޯޓަށް ހާޒިރުކުރުމުން، އެ ކޯޓުން ނިންމީ 3 މީހުންގެ ބަންދަށް 15 ދުވަސް ދިނުމަށެވެ.

އިއްޔެ އެ މުއްދަތު ހަމަވުމުން އެ 3 މީހުން ކޯޓަށް ހާޒިރު ވަނީ ކޮށްފައެވެ.

އޭގެތެރެއިން 26 އަހަރުގެ އެކަކަށް ޝަރުތުކުރުމަށް ފަހު ކޯޓުން އޭނާ ދޫކޮށްލާފައިވާ ކަމަށާއި ދެން ތިބި 2 މީހުންގެ ބަންދަށް 15 ދުވަސް އިތުރުކޮށްފައިވާ ކަމަށް ފުލުހުންގެ މީޑިއާ އޮފިޝަލް ވިދާޅުވިއެވެ.