ބޮމެއް މުލިއާގެ ކައިރީގައި ގޮއްވައިލާނެކަމުގެ އިންޒާރުދިން މީހަކު ދޫކޮށްލައިފި

ރައީސުލްޖުމްހޫރިއްޔާ ދިރިއުޅުއްވާ މުލިއާގެ ކައިރިއަށް ގޮސް އެ ތަން ގޮއްވައިލަން އިންޒާރުދިން މައްސަލައިގައި ހައްޔަރުކުރި 2 މީހުންގެތެރެއިން އެކަކު ދޫކޮށްލައިފިއެވެ.

މުލިއާގެ ކައިރިއަށް ގޮސް، އެ ތަން ގޮއްވައިލަން އިންޒާރުދެމުން ދިޔަ 2 މީހުން ހައްޔަރުކުރީ މިއަދު މެންދުރުގައެވެ. އެ 2 މީހުން މުލިއާގެ ކައިރިއަށް ގޮސް ތިބިއިރު ބައެއް ސާމާނު ވެސް ހުއްޓެވެ. އެ މީހުންވަނީ އެ ތަން ގޮއްވައިލާނެކަމަށް ބުނެ، އިންޒާރުދީފައެވެ.

އެގޮތުން ފުލުހުންގެ ޚާއްސަ ޓީމެއް އެ ސަރަހައްދަށް ގޮސް އެ 2 މީހުން ގެންގުޅުނު ސާމާނުތައް ބެލުމަށް ފަހު ވަނީ ހައްޔަރުކޮށްގެން ގެންގޮސްފައެވެ.

ފުލުހުން މިރޭ ބުނީ ހައްޔަރުކުރި 2 މީހުންގެތެރެއިން އެކަކު މިހާރު ދޫކޮށްލައިފައިވާ ކަމަށެވެ.

އެކަކު ދޫކޮށްލައިފައިވާއިރު، ދެން ހުރި މީހާގެ ބަންދާމެދު ގޮތެއް ނިންމުމަށް މާދަމާ ކޯޓަށް ގެންދާނެއެވެ. އެނގިފައިވާ ގޮތުން މިއަދު ހައްޔަރުކުރި ދެ މީހުންނަކީ މަސްތުވާތަކެތީގެ ރެކޯޑު އޮންނަ 2 މީހުންނެވެ.