ރަހީނުކޮށް މަރާލި ކުއްޖާގެ ޕޯސްޓު މޯޓަމް ހަދަން ނިންމައިފި

ރަހީނު ކުރުމަށް ފަހު މަރާލާފައިވާ އުމުރުން 13 އަހަރުގެ ކުއްޖާ މަރުވި ގޮތް ބެލުމަށް ޕޯސްޓު މޯޓަމް ހަދަން ރާއްޖެއިން ބޭރަށް ގެންދަން ނިންމައިފިއެވެ.

ކުއްޖާ ގެއްލިގެން ރިޕޯޓް ކުރީ މިދިޔަ އާދީއްތަ ދުވަހުގެ ރޭގައެވެ. ގދ. މަޑަވެލި އަށް ނިސްބަތްވާ އެ ކުއްޖާ ފެނުނީ ހުޅުމާލެ ދެވަނަ ފިޔަވައްސާއި ދިމާ މޫދުން ފޮށްޓެއްގައި އޮއްވައެވެ. އޭރު އެ ކުއްޖާ އޮތީ މަރާލާފައެވެ.

މިއަދުގެ ވަގުތެއްގައި ހަށިގަނޑު އިންޑިއާ އަށް ގެންދަން ފުލުހުން އަންނަނީ މަސައްކަތް ކުރަމުން ކަމަށް ވެސް ކުއްޖާގެ އާއިލާ އިން ބުނެއެވެ.

މި މައްސަލައާ ގުޅިގެން އުމުރުން 17 އަހަރުގެ ދިވެހި ފިރިހެނަކާއި އުމުރުން 27 އަހަރުގެ ފިރިހެނަކު ވަނީ ހައްޔަރުކޮށްފައެވެ. ހައްޔަރުކުރި ދެ މީހުންނަކީ ކުއްޖާގެ ދެ އެކުވެރިން ކަމަށްވެއެވެ. މިކަމުގެ އިތުރު މައުލޫމާތު ލިބޭގޮތް ވަނީ ނުވެފައެވެ.

ކުއްޖާގެ މަރާ ގުޅިގެން މަޖިލީހުގެ ޖެންޑާ އެންޑް ހިއުމަން ރައިޓްސް ކޮމިޝަނުން ވަނީ ކުއްލި ބައްދަލުވުމެއް ތާވަލުކޮށްފައެވެ. މި ވަގުތު އެ ކުއްޖާގެ ހަށިގަނޑު އޮތީ އައިޖީއެމްއެޗްގައެވެ. ގިނައިރުތަކެއް ވަންދެން މޫދުގައި އޮތުމުގެ ސަބަބުން ކުއްޖާގެ ސިފަވަނީ ވަރަށް ބޮޑަށް ގެއްލިފައެވެ.

ކުއްޖެއްގެ ފުރާނަ ގަސްތުގައި ދުއްވާލުމަކީ މުޅި ގައުމު ކަރުނަ އަޅަން ޖެހޭ ވަރުގެ ކަމެއް ކަމަށް ޖެންޑާ މިނިސްޓަރު އައިޝަތު މުހައްމަދު ދީދީ ވަނީ ވިދާޅުވެފައެވެ.